Search
Close this search box.

أنا مميز

المذيع: مساء الخير يا كل أصحابي الحلوين … بنرحب بيكم في برنامجنا الأسبوعي “مشكلتي ليها حل” … ماتنساش تراسلنا وتبعتلنامشكلتك وأكيد هنلاقيلها حل .انهاردة معانا صديقة للبرنامج جاية مخصوص عشان تحكيلنا مشكلتها وعايزانا نشوفلها حل … خلونا نتعرف عليها

الضيفة: أنا اسمي جميلة

المذيع: اسم جميل يا جميلة

جميلة: لا مش جميل … ده هو ده سبب مشكلتي

المذيع: إزاي ؟؟؟

جميلة : أحكيلك … أصحابي دايمًا بيتريقوا عليا ويقولولي إنتي جميلة  إنتي؟؟؟ بصي بصي شعرك عامل ازاي ؟ اسمك مش لايق عليكي خالص … أحسنلك تغيري اسمك وأنا كل ما باسمع الكلام ده باضايق و باقعد أقول أنا خلاص مش هانزل من البيت و أنا مش عايزة أقابل حد وأنا أصلاً محدش بيحبني  وماليش لازمة… وساعات أبص لنفسي في المراية واقعد أقول لربنا إنت ليه خلقتني وحشة كده ؟

المذيع: طب ممكن أسألك سؤال ؟

جميلة: إتفضل

المذيع: تفتكري ربنا ممكن يعمل حاجة وحشة أو فيها غلطة؟

جميلة: لا … ربنا بيعمل كل حاجة حلوة ومفيهاش غلطة

المذيع: كلامك مظبوط يا جميلة … طب ممكن أسألك سؤال تاني ؟

جميلة: إتفضل

المذيع: تفتكري ربنا ممكن يعمل حاجة وميكونش ليها دور ؟ يعني مثلاً ربنا عمل الشمس عشان يكون ليها دور ولا عملها كده وخلاص ؟

جميلة: وده سؤال برضه ؟ أكيد كل حاجة ربنا عملها ليها دور … والشمس ليها دور مهم بتنورلنا وبتدفينا و…

المذيع: برافو عليكي يا جميلة

جميلة: بس مال ده بمشكلتي ؟

المذيع: إنتي كمان يا جميلة ربنا خلقك عشان ليكي دور… ربنا حاطط لكل واحد فينا خطة وكل واحد فينا له دور غير التاني… وعايز أقولك على حاجة كمان حتى وإنتي صغيرة كده برضه ليكي دور … وفيه ناس كتير الكتاب المقدس بيحكلنا عنهم إنه الله استخدمهم في أعمال عظيمة وهما كانوا صغيرين زي داود والبنت الصغيرة إللي كانت مسبية عند نعمان السرياني. يعني تاني متقوليش أنا ماليش لازمة وأنا مش فارقة مع حد

جميلة: لا خلاص بقى مانا فهمت … أنا مميزة وليا دور .

المذيع: برافو عليكي يا جميلة.
تيجي قبل ما ننهي حلقتنا نقول لأصحابنا آية من الكتاب المقدس : “لا تقل إني ولد”   و دي مكتوبة في سفر أرميا 1 : 6

المذيع: مبسوطين إنك كنتي معانا إنهاردة يا جميلة

جميلة: أنا اتبسطت أكتر إني جيت وحكيت معاك انهاردة

المذيع: وبكدة وقت حلقتنا انتهى … نشوفكم في الحلقة الجاية … ربنا معاكم يا أصحابي … سلاااااام

© www.madareselahad.org