Search

ورجعنا المدرسة

الشخصيات:

 كركر – فرفورة  – بابا – ماما – ميرا – سمسم

المشهد الأول:

كركر وفرفورة مع بعض في البيت

كركر:- أنا بجد مش مصدق نفسي… الأجازة لحقت تخلص كده!! وداخلين على المدرسة خلاص.

فرفورة:- ماتفكرنيش (إهئ إهئ ) هانرجع تاني للصحيان بري والمذاكرة

كركر:- وكله كوم والامتحانات كوم تاني.

فرفورة: ولا مذاكرة العربي .. وإعرب ماتحته خط

كركر:- والحساب والعقاب  .. آه ..آه من المذاكرة

فرفورة:- خلاص بقى مش ناقصة

كركر:- المهم بقى هانشتري إيه السنة دي؟

أنا من السنة اللي فاتت نفسي في كوتشي جامد أوي شفته في المحل اللي على أول الشارع .. لازم بابا يجيبهولي السنة دي.

فرفورة:- أنا بقى عايزة مقلمة فيها جليتر وحاجات ملونة كده بتنور في الضلمة

كركر:- ضلمة إيه يافرفورة انتي هاتستعمليها الصبح

فرفورة:- وانت مالك! هو أنا قولت لك حاجة على الكوتتشي بتاعك؟

كركر:- خلاص خلاص .. إنتي جاهزة تتخانقي على طول؟!

فرفورة:- المهم يالا إجهز علشان مانتأخرش على مدارس الأحد

(يخرج كركر وفرفورة من المسرح)

المشهد الثاني

(بابا يقرا الجرنال وماما تدخل تتكلم معاه)

ماما :-  يامنير كنت عاوزة اتكلم معاك في حاجة مهمة.

بابا:-  يترك الجرنال .. إتفضلي قولي بس إديني كوباية الشاي الأول

ماما:-  المدارس على الأبواب يامنير وإحنا عندنا مصاريف كتير

بابا:-  عارف ياسامية عارف وإن شاء الله ربنا يدبرها زي كل سنة

ماما:-  أنا عارفة إنك بتعمل اللي عليك والحاجات بقت غالية أوي

بابا:-  هانحاول نجيب كل الحاجات اللي الأولاد محتاجينها

ماما:-  ربنا يعينك

(تذهب ماما وتدخل فرفورة وكركر)

كركر:- بابا يابابا ياأحلى بابا

فرفورة:- بابا يابابا ياأجمل بابا

بابا:- أيوه أيوه أنا عارف الدخلة دي

إتفضل ياسيدي إنت وهي .. طلباتكم

كركر:- طول عمري باقول بابا ده بيفهم الحاجة وهي طايرة

فرفورة:- طبعاً انت عارف يابابا ان المدارس قربت خالص

بابا:- هو إيه حكاية المدارس النهاردة؟! إمم

عارف ياست فرفورة وبعدين؟!

كركر:- وطبعاً إنت عارف ان اولادك حبايبك محتاجين حاجات جديدة

بابا:- لأ مش كله جديد ياكركر..الحاجات اللي جبناها السنة اللي فاتت ولسه كويسة هانستعملها

كركر:-  (بغيظ) يعني إيه يابابا؟1 أنا كنت عاوز كوتشي جديد

فرفورة:- وأنا كنت عاوزة مقلمة جديدة

بابا:- هو الكوتشي بتاعك اتقطع؟!

كركر:- لأ بس شكله مابقاش حلو .. وبعدين كان فيه كوتشي كان نفسي اجيبه من زمان

بابا:- وانتي يافرفورة مال مقلمتك؟!

فرفورة:- مالهاش يابابا بس كان فيه مقلمة حلوة شفتها عند واحدة صاحبتي وكان نفسي اجيب زيها

بابا:- بصوا ياولاد ..المصاريف زادت والحاجات بقيت غالية وانا باوعدكم انه اي حاجة انتم محتاجينها ان شاء الله هانجيبها لكن لو مش محتاجينها مش هانقدر نجيبها

كركر:- (بحزن) كده يابابا؟! أنا الكوتشي ده كان نفسي فيه من زمان

فرفورة:- (بضيق) وانا برضو كان نفسي في المقلمة دي اوي

بابا:- (بحزم) دي ظروفنا ياولاد ونشكر ربنا اننا قادرين نجيب كل احتياجاتنا .. يالا تصبحوا على خير

كركر وفرفورة:- وانت من أهله يابابا

فرفورة:- أنا متضايقة جداً

كركر:- وأنا كمان

فرفورة:- كان نفسي اتمنظر قدام صحباتي بالمقلمة الجديدة

كركر:- وانا كمان كان نفسي كريم يشوف الكوتشي بتاعي ويعرف انه مش أحسن مني

فرفورة:- على فكرة بقى أنا مش هاسيب بابا وهافضل ازن عليه

كركر:- وتفتكري ان الزن هايجيب نتيجة؟!

لو بابا وماما كانوا بيحبونا كانوا جابولنا كل حاجة نفسنا فيها

فرفورة:- معاك حق ياكركر .. واضح كده إنهم مش بيحبونا

(يخرجوا من المسرح)

المشهد الثالث

ميرا وسمسم بيتكلموا مع بعض ويأتي إليهم كركر وفرفورة

ميرا:- كركر .. فرفورة إزيكم

كركر:- كويسيين الحمدلله

سمسم:- مالك شكلك متضايق؟!

ميرا:- وانتي كمان يافرفورة شكلك متضايق… فيه حاجة حصلت؟

كركر:- عرفنا إن بابا وماما مش بيحبونا

ميرا:- إيه الكلام الكبير ده؟!

فرفورة:- أيوه مش بيحبونا .. لو بيحبونا كانوا جابولنا الحاجات اللي نفسنا فيها

سمسم:- يعني هو ده خلاكم تقولوا كدا؟! إنهم مش عاوزين يجيبولكم اللي نفسكم فيه؟ امم

ميرا:- السؤال بقى إنتم محتاجين للحاجات دي؟

كركر:- إنتي برضو بتتكلمي زي بابا؟!

سمسم:- أيوه ياكركر فيه فرق كبير بين إنك محتاج للحاجة وإنك عايز الحاجة

فرفورة:- إزاي بقى؟! أنا عايزة المقلمة يبقي محتاجاها

ميرا:- لأ يافرفورة محتاجة الحاجة يعني ماتقدريش تتصرفي من غيرها مثلاً احنا محتاجين للماية لكن مااقدرش اقول انا على طول بابقى محتاجة للبيبسي مثلاً

سمسم:- أنا هاشارككم بحاجة اتعلمتها السنة اللي فاتت .. أنا كنت زيك كده ياكركر كل مااشوف حاجة اقول انا محتاجها واكون عايز اشتريها على طول وممكن الحاجة دي تكون موجودة عندي فعلا لك انا باكون عايز اشتري الجديد ومش بابقى عايز ابص على الحاجات اللي عندي

فرفورة:- انا دلوقتي مش عاوزة استعمل المقلمة بتاعتي القديمة رغم إنها كويسة

كركر:- ولا أنا كمان عايز البس الكوتشي القديم بتاعي رغم إنه شغال معايا ومافيهوش أي حاجة

سمسم:- أنا بالظبط كنت زيك كده وعلى طول بقيت متضايق ومش راضي وزعلان ووصلت لاني مش عايز اتكلم مع بابا وماما لانهم مش بيجيبولي كل اللي نفسي فيه

ميرا:- ياه ياسمسم .. وإيه اللي حصل بعد كده؟

سمسم:- سافرت مؤتمر مع مدارس الأحد وف وقت الخلوة كانت الآية في عبرانيين 13 :5

كُونُوا مُكْتَفِينَ بِمَا عِنْدَكُمْ، لأَنَّهُ قَالَ: «لاَ أُهْمِلُكَ وَلاَ أَتْرُكُكَ»”

وعمو بيشاركنا بالآية دي كان بيقولنا انه  ازاي اكون راضي وشاكر واكتفي باللي عندي واشكر ربنا عليه وازاي برضو ان هدف الشيطان انه يخليني متذمر على طول وعيني على الحاجات اللي مش عندي!

كركر:- (بيفكر) أنا كده فعلاً مش باشكر وباتذمر

فرفورة:- وأنا مش مكتفية زي ماالآية بتقول

سمسم:- خدوا بالكم من فخ ابليس اكيد بابا وماما بيحبوكم بدليل انهم دايماً بيحاولوا يجيبوا الحاجات اللي انتم محتاجينها

ميرا:- مش اللي انتم عايزينها

كركر:- شكراً ياسمسم إنك شاركتنا باللي حصل معاك …أنا فعلا محتاج اراجع تصرفاتي وطريقة تفكيري

فرفورة:- وانا كمان ياكركر محتاج اراجع انا باشوف الامور ازاي

كركر: والاهم اني لازم اعتذر لبابا على طريقتي في الكلام معاه.

تأليف : أ/ سالي أنيس