Search

قصة السامري الصالح

الشخصيات: الراوي – ناموسي – يسوع – اللصوص – الرجل اليهودي – الكاهن – اللاوي – السامري

الراوي : يسوع  حكى قصص لكل الناس . حتى الناس إللي كانوا عارفين الناموس اليهودي كويس أوى كانوا محتاجين مساعدة عشان يفهموا ملكوت الله.

الناموسي: يسوع ، أعمل إيه علشان يكون لي حياة أبدية ؟

يسوع : إنت عارف إللي مكتوب فى الناموس كويس . إيه إللي الناموس بيقوله ؟ وإنت فاهمه إزاي ؟

الناموسي : الناموس بيقول حب الرب إلهك من كل قلبك ومن كل نفسك ،حبه من كل قدرتك ومن كل فكرك .والناموس بيقول كمان إنك تحب قريبك زى ما بتحب نفسك.

يسوع : أيوة ، إنت فعلا جاوبت صح . اعمل كده .

الراوي : لكن الراجل كان عايز يبين نفسه إنه بار قدام يسوع . علشان كده سأله…

الناموسي : لكن ، يايسوع ، مين هو قريبي؟

يسوع : أنا هاحكيلك قصة علشان تعرف مين هو قريبك.

(فاصل موسيقي للقصة)

يسوع : كان فيه انسان يهودي نازل من أورشليم لأريحا . وفجأة، سمع دوشة.

(أصوات رجلين بتقرب )

اللصوص : بسرعة ، فى واحد جاي تعالوا نهجم عليه . ده راجل يهودي . ماتيجوا نضربه ! ياااه دى هدومه تحفة ، يلا بينا نخدها . دوروا على أي فلوس معاه .  كل دي حاجتنا .

يسوع : الحرامية ضربوا الراجل اليهودي ، وسرقوا كل ممتلكاته ، وكمان هدومه، وسابوه يموت على جنب في الطريق .

وإللي حصل إنه كان فيه كاهن نازل فى نفس الطريق

الراجل اليهودي : ساعدني ، أرجوك ساعدني .

الكاهن : (بيكلم نفسه ) ياااااه ، إيه الراجل الفقير ده إللي مرمي فى الطريق . يكون ميت ؟ لو أنا لمست حد ميت ، أنا كده هابقى نجس . أنا أحسن أمشى على الجنب التاني من الطريق .

يسوع : عدى كمان شخص لاوي ، إللي هو الراجل إللي بيهتم بالهيكل .

الراجل اليهودي : ساعدني. أرجوك ، حد يساعدني .

اللاوي : (بيكلم نفسه ) ياااه ،مش ممكن ، أما أشوف الراجل ده. ده كلmجسمه بينزف ومتبهدل . أنا مستغرب إيه إللي حصل له. بس أنا مش عايز أخلّي هدومي كلها تبقى مليانة دم … أنا أحسنلي أمشي على الجنب التاني من الطريق.

يسوع : بعد كده كان فيه راجل سامري نازل فى نفس الطريق . اليهود كانوا بيكرهوا السامريين ومكنش ممكن يعملوا أى حاجة يساعدوهم بيها. والسامريين برضه كانوا بيكرهوا اليهود جدا .

الراجل اليهودي : ساعدني . ساعدني .

الراجل السامري : (بيكلم نفسه ) ياااه ، مش ممكن . الراجل الفقير ده اتضرب واتسرق . دي حاجة فظيعة . ده ممكن يكون ميت ، لا أنا مش هاقدر أمشي وأسيبه يموت هنا في الشارع . أنا لازم أتصرف .
(السامري يكلم اليهودي) متقلقش . أنا هاخد بالي منك . خليني بس الأول أحطلك شوية زيت على جروحك. وبعد كده هاحطلك شاش عليها وهاخدك لفندق وهناك تقدر تستريح وتبقى أحسن.

يسوع : وفعلاً داوى السامري جروح اليهودي وحطه على حماره ، وأخذه لأقرب فندق.

الراجل السامرى : من فضلك ،  يا صاحب الفندق .اتفضل عملتين فضة و خلّي بالك من الراجل ده . أنا لازم أمشي ، لكن لما أرجع أناهادفع لك أي تكلفة زيادة مقابل  عنايتك بالراجل ده.

(فاصل موسيقي للقصة)

الراوي : ولما يسوع خلص القصة سـأله …

يسوع : كويس ، بما أنك عارف الناموس كويس ، أنهي واحد من الثلاثة دول كان قريب للراجل إللي اللصوص هجمت عليه ؟

الناموسي : الراجل إللي إتضايق عليه ووقف علشان يهتم بيه.

يسوع: إنت جاوبت صح . روح واعمل زي ماهو عمل .

(فاصل موسيقي للقصة )

الراوي : لو عايز تقرأ قصص أكتر يسوع حكاها عن ملكوت الله ، اقرأ أنجيل لوقا في العهد الجديد من كتابك المقدس.

مترجم من : www.kidscorner.net

© www.madareselahad.org